మోహినీ భస్మాసుర (01-12-1966)

0
100

అలనాటి చిత్రాలు

మోహినీ భస్మాసుర (01-12-1966)

1966 లో 34 తెలుగు చిత్రాలు విడుదల కాగా, ఎన్ టి ఆర్ 12 చిత్రాల్లోనూ, ఏయన్నార్ నాలుగు చిత్రాల్లోనూ నటించారు. ఆ ఏటి సూపర్ హిట్ సినిమా ‘పరమానందయ్య శిష్యుల కథ’ (07-04-1966)

1966 సంవత్సరంలో సంక్రాంతికి నాయక, ప్రతినాయక పాత్రలు పోషించి, స్వీయ దర్శకత్వంలో ఎన్ టి ఆర్ రూపొందించిన ‘శ్రీకృష్ణ పాండవీయం’, ఫిబ్రవరిలో రామినీడు దర్శకత్వంలో పల్నాటి యుద్ధం, మార్చిలో రాజ్యం పిక్చర్స్ శకుంతల, ఏప్రిల్ లో సి పుల్లయ్యగారి దర్శకత్వంలో ఆ ఏడాది సూపర్ హిట్ సినిమా పరమానందయ్య శిష్యుల కధ, మే లో శ్రీకాకుళాంధ్ర మహా విష్ణు కధ, మంగళ సూత్రం, జూన్ నెలలో ఎన్ టి ఆర్, విఠలాచార్య కలయికలో రూపొందిన ‘అగ్గిబరాటా’, జూలై నెలలో సంగీత లక్ష్మి, ఆగస్టులో శ్రీ కృష్ణ తులాభారం , సెప్టెంబర్ నెలలో అడుగుజాడలు, పిడుగు రాముడు , అక్టోబరులో డాక్టర్ ఆనంద్ విడుదలయ్యాయి.

ఇవి కాక చైల్డ్ సెంటిమెంట్తో తెరకెక్కిన ‘లేత మనసులు’ , మొనగాళ్ళకు మొనగాడు, పొట్టి ప్లీడర్, ‘గూఢచారి 116’ ‘చిలకా-గోరింక’, ఆటబొమ్మలు, లోగుట్టు పెరుమాళ్ళ కెరుక, భీమాంజనేయ యుద్ధం, విజయ శంఖం, పాదుకా పట్టాభిషేకం, కన్నె మనసులు, భక్త పోతన, హంతకులొస్తున్నారు జాగ్రత్త, ఆమె ఎవరు, భూలోకంలో యమలోకం, శ్రీమతి, మోహినీ భస్మాసుర,

అక్కినేని నటించిన 5 సాంఘిక చిత్రాలు జమీందార్, ఆత్మ గౌరవం, నవరాత్రి, ఆస్థిపరులు, మనసే మందిరం విడుదలయ్యాయి.

52 సంవత్సరాలక్రితం 01-12-1966 న విడుదలైన మోహినీ భస్మాసుర సినిమా విశేషాలు:-

నిర్మాత & దర్శకుడు: బి.ఎ.సుబ్బారావు;
సంగీతం: ఎస్.రాజేశ్వరరావు;
కథ: గబ్బిట వెంకట్రావు;
పాటలు: గబ్బిట వెంకట్రావు, ఆరుద్ర, కొసరాజు;
గానం : ఘంటసాల, పి.సుశీల, బెంగుళూరులత, కె.రఘురామయ్య, మాధవపెద్ది;
తారాగణం: ఎస్వీఆర్ పద్మిని, కాంతారావు, కె.రఘురామయ్య, ధూళిపాళ, రామకృష్ణ, నగేష్, పద్మనాభం, రమణారెడ్డి,
కళ: వాలి
నృత్యం: రాజు-జయరాం
ఎడిటింగ్: మార్తాండ్
ఛాయాగ్రహణం: ఎల్లప్ప
అసోసియేట్ దర్శకులు: కె ఎస్ ప్రకాశరావు
నిర్మాత, దర్శకులు: బిఎ సుబ్బారావు.

యక్షగానాలుగా, నృత్య నాటికలుగా ప్రదర్శింపబడి ప్రాచుర్యం పొందిన పురాణగాథ ‘మోహిని భస్మాసుర’. చలనచిత్రంగా తొలిసారి ఆంధ్ర టాకీసు బ్యానర్పై సి పుల్లయ్య స్వీయ దర్శకత్వంలో నిర్మించారు. వెంకటావధాని రచన, ఎటి రామానుజాచార్యులు సంగీతం, భక్తవేల్ ఛాయాగ్రహణంతో వచ్చిన చిత్రంలో మోహినిగా పుష్పవల్లి, భస్మాసురునిగా ఏవి సుబ్బారావు నటించారు. అవుట్డోర్లో రూపొందిన తొలి టాకీ చిత్రంగా దీనికి పేరుంది. డిసెంబర్ 1, 1939న చిత్రం విడుదలైంది.

పౌరాణిక గాథలపట్ల ఆసక్తిగల దర్శక నిర్మాత బిఎ సుబ్బారావు స్వీయ దర్శకత్వంలో బిఎఎస్ ప్రొడక్షన్స్ బ్యానర్పై మరోసారి ‘మోహిని భస్మాసుర’ చిత్రం రూపుదిద్దుకుంది. ఉపాధ్యాయ వృత్తి నిర్వహిస్తూ రచయితగా పేరొందిన గబ్బిట వెంకట్రావు ఈ చిత్రానికి కథ, మాటలు, పద్యాలు సమకూర్చారు. గబ్బిట రాసిన ‘అల్లూరి సీతారామరాజు’ను బందా కనకలింగేశ్వరరావు ప్రదర్శించారు. పలు పౌరాణిక చిత్రాలకూ పాటలూ పద్యాలు అందించిన అనుభవం గబ్బిటకు ఉంది. ‘విష్ణుమాయ’ చిత్రాన్ని నిర్మించటమే కాదు, శ్రీరామాంజనేయ యుద్ధం, భక్తఅంబరీష, ఇద్దరు కొడుకులు చిత్రాలకూ గబ్బిట పని చేశారు.

దానవ జాతి ఉద్ధరణ కోసం రాక్షస గురువు శుక్రాచార్యులు (ధూళిపాళ) నడుంకడతాడు. ఆయన ఆరాధన మెచ్చిన ఈశ్వరుడు (రామకృష్ణ) ఓ బాలుని అనుగ్రహిస్తాడు. భస్మం నుంచి ఉద్భవించిన ఆ శిశువుకు భస్మాసురుడని నామకరణం చేసి, పెంచి పెద్ద చేస్తాడు ఆచార్యులు. బాలునిగా ఉన్నపుడే అతనివల్ల తన ఇంద్ర పదవికి ముప్పు వాటిల్లుతుందని నారదునివల్ల తెలుసుకున్న దేవేంద్రుడు (రఘురామయ్య), భుస్మాసురుని అంతంచేయ ప్రయత్నించి విఫలుడౌతాడు. అసుర రాకుమారి కల్యాణి (అనురాధ)ని వివాహం చేసుకొని సింహాసనం అధిష్టించిన భస్మాసురుడు (ఎస్ వి రంగారావు) ఈశ్వరుని గూర్చి తపస్సు చేసి, తన చేయి ఎవరి నెత్తినపెడితే వారు మరణించేలా వరం పొందుతాడు. వర గర్వంతో విష్ణు భక్తులను భస్మం కావిస్తాడు. ఇంద్రుడు, విష్ణువు (కాంతారావు), లక్ష్మి (రత్నం) భస్మాసురునికి దూరంగా వెళ్తారు. ఒకసారి పొరపాటున తన కుమార్తె తలపై భస్మాసురుడు చేయి తాకించటంతో, ఆ బాలిక మరణిస్తుంది. దీనికి కారణం శివుడేనని నారదుడు (బాలయ్య) చెప్పడంతో, ఈశ్వరుని వద్దకు వెళ్ళిన అసురుడు తన కుమార్తెను బ్రతికించమని కోరతాడు. అది అసాధ్యమని చెప్పిన ఈశ్వరునిపై ఆగ్రహించి, నెత్తిన చేయిపెట్టి భస్మం చేయడానికి ప్రయత్నించగా ఈశ్వరుడు పలాయనం సాగిస్తాడు. విష్ణుమూర్తి, మోహిని (పద్మిని) అవతారంలో భస్మాసురునికి తారసపడి, అతని ధ్యాసను ఆత్మశక్తి సాధనకై మళ్ళించి, ఆ ప్రయత్నంలో చేసే నృత్య సాధనలో అసురుడు తన తలపై చేతిని పెట్టుకోవడంతో తనకుతానే భస్మం కావటంతో చిత్రం ముగుస్తుంది.

ఈ చిత్రంలో విష్ణు భక్తులు , సాధువులుగా నాగేష్, రమణారెడ్డి, పద్మనాభం, అల్లురామలింగయ్య నటించారు. చిత్రంలో శుక్రాచార్యుని నేత్రం పోవటానికి కారణం చూపుతూ బలిచక్రవర్తి వామనునికి దానమిచ్చే సన్నివేశం చూపించారు. బలిచక్రవర్తిగా సత్యనారాయణ నటించారు.

వారిపై భాగవత పద్యాలు ‘ఆదిన్ శ్రీసతి కొప్పుపై తనువుపై’, ‘కారే రాజులు రాజ్యములు’ ‘నిరయంబైన నిబంధనమైన’ పద్యాలు (ఘంటసాల) చిత్రీకరించటం ఆకట్టుకుంది.

ఆదిన్ శ్రీసతి కొప్పుపై, తనువుప, అంసోత్తరీయంబుపై
పాదాబ్జంబులపై, కపోలతటిపై, పాలిండ్లపై నూత్న మ
ర్యాదన్ జెందు కరంబు క్రిందగుట, మీదైనా కరంబుంట మే
ల్కాదే రాజ్యము గీజ్యమున్ సతతమే కాయంబు నాపాయమే

ఇతడు చెయ్యి చాచి అడుగుతున్నాడు. ఈ చెయ్యి ఎంత గొప్పది? మొదట లక్ష్మీదేవి కొప్పుపైన, శరీరం పైనా, పైటపైనా, పాదపద్మాలపైనా, చెక్కిళ్ళ పైనా, పాలిండ్లపైనా సరికొత్త గౌరవాన్ని పొందేది.అటువంటి గొప్ప చెయ్యి ఇప్పుడు క్రిందిది కావడమూ, నా చెయ్యి పైది కావడమూ ఎంత అదృష్టం! ఎంత మేలు! ఈ రాజ్యం ఏపాటిది? ఇది శాశ్వతంగా వుండేది కాదు. ఈ శరీరం కూడా పడిపోకుండా నిలిచేది కాదు.

ఇక్కడ విష్ణువుని ఒక మామూలు పురుషుడిగా లక్ష్మీదేవిని మామూలు స్త్రీగా ఊహించుకొని, ఇక్కడ వర్ణించినది ఆ భార్యాభర్తల శృంగారాన్ని అనుకుంటే, ఈ “నూత్న మర్యాదన్ జెందు” అనే మాట పొసగదే! ఇది వట్టి సాంసారిక శృంగారమైతే, ఆ చేతికి కొత్త మర్యాద ఎక్కడనుండి వస్తుంది? రాదు. ఇక్కడ వర్ణించిన లక్ష్మీదేవి అంగాలన్నీ వివిధ రకాలైన సంపదలని మనం భావించాలి. అలాంటి సంపదలని లోకానికి ఎప్పుడూ దానం చేస్తూ ఉండడం వల్ల ఎప్పటికప్పుడు ఆ చేతికొక కొత్త గౌరవం వస్తుందన్నమాట. అలా ఎప్పుడూ పైనే ఉండే చెయ్యి ఇప్పుడు కిందయ్యింది! తన చేయి ఆ చేతిపైన ఉంది. అంటే లోకానికి సమస్త సంపదలనీ అందించే విష్ణువుకి కూడా తాను ఇవ్వగలిగింది ఏదో ఉందన్న మాట. అంతకన్నా గొప్ప విషయం మరొకటి ఏముంటుంది! ఇక రాజ్యం గీజ్యం ఉంటేనేం పోతేనేం. కాయము (శరీరం) ఎప్పటికైనా నశించేదే కదా. ఈ జ్ఞానం బలిచక్రవర్తిలో పరిపూర్ణంగా ఏర్పడింది.

కారే రాజులు రాజ్యముల్ గలుగవే గర్వోన్నతిన్ చెందరే
వారేరీ సిరి మూట గట్టుగొని పోవన్ జాలిరే ఉర్విపై
పేరైనన్ గలదే, శిబి ప్రముఖులున్ ప్రీతిన్ యశః కాములై
ఈరే కోర్కెలు, వారలన్ మరచిరే యిక్కాలమున్ భార్గవా..

“ఎందరో రాజులయ్యారు, వాళ్ళకి రాజ్యాలు కలిగాయి, కాని అందువల్ల జరిగిందల్లా వాళ్ళకు గర్వం పెరగటం త ప్ప మరేమీ కాదు” అని. మరి ఆ తర్వాత ఏం జరిగింది? వాళ్ళు ఏమయ్యారు? ఆ సంపదని మోసుకుపోలేదు కదా! పోనీ, భూమ్మీద వాళ్ళ పేరైనా నిలబడిందా? అదీ లేదు. వాళ్ళెవరో ఎవరికీ పట్టదు. అదే శిబి లాటి దాతలు కీర్తి కోసం కోరికలు తీర్చారు. వాళ్ళ పేర్లు ఇప్పటివరకూ నిలిచాయి.

నిరయంబైన నిబంధమైన ధరణీ నిర్మూలనంబైన, దు
ర్మరణంబైన, కులాంతమైన నిజమున్ రానిమ్ము పోనిమ్ము పో
హరియైనన్ హరుడైన నీరజభవుండభ్యాగతుండైననౌ
తిరుగన్ నేరదు నాదు జిహ్వ, వినుమా ధీవర్య! వేయేటికిన్

నిరయంబు = నరకము దాపురించినది; ఐనన్ = అయినసరే; నిబంధము = కట్టివేయబడుట; ఐనన్ = జరిగినసరే; ధరణీ = రాజ్యము; నిర్మూలనంబు = నాశనము; ఐనన్ = అయినాసరే; దుర్మరణంబు = దుర్మరణము; ఐనన్ = సంబవించినసరే; కుల = వంశము; అంతము = నాశనము; ఐనన్ = జరిగినసరే; నిజమున్ = సత్యమునే; రానిమ్ము = ఒప్పుకొనెదను; కానిమ్ము = జరిగెడిదిజరగనమ్ము; పో = భయంలేదు; హరుడు = శివుడు; ఐనన్ = అయినా; హరి = విష్ణువు; ఐనన్ = అయినా; నీరజభవుండు = బ్రహ్మదేవుడయినా; అభ్యాగతుండు = అతిథిగావచ్చినవాడు; ఐనన్ = అయిన; ఔ = సరే; తిరుగన్ = వెనుతిరుగుట; నేరదు = చేయలేదు; నాదు = నా యొక్క; జిహ్వ = నాలుక; వినుమా = వినుము; ధీవర్య = విజ్ఞాని; వేయేటికిన్ = పలుమాటలుదేనికి.

మిగతావి అన్నీ అనవసరమయ్య! నే బంధింప బడటం కాని, నాకు దుర్మరణం కలగటం కాని, నాకు నరకం దాపురించటం కాని, నా కులమే నాశనం కావటం కాని, భూమండలం బద్దలవటం కాని, నిజంగానే వస్తే రానియ్యి; జరుగుతే జరగనీ; ఏమైనా సరే నేను మాత్రం అబద్దమాడ లేను. దానం పట్టడానికి వచ్చిన వాడు సాక్షాత్తు ఆ పరమ శివుడే అయినా, ఆ విష్ణుమూర్తే అయినా, ఆ బ్రహ్మదేవుడే అయినా సరే నా నాలుకకి ఆడిన మాట తప్పటం రాదు. పరమ విజ్ఞాన స్వరూప శుక్రాచార్య! నా నిర్ణయం వినవయ్య!

చిత్ర ప్రారంభంలో భస్మాసుర జననం కోసం శుక్రాచార్యుల ప్రార్థన, శివపార్వతుల తాండవ నృత్యం, ప్రార్థన గీతం ‘చంద్రశేఖర, చంద్రశేఖర శరణు శరణు మహేశ్వర’లాంటి సన్నివేశాలు భక్త్భివం రేకెత్తేలా చిత్రీకరించారు.

భస్మాసురుని ఆహార్యం బాలునిగా, యువకునిగా వెరైటీగా చూపించారు. బాలునిగా ఇంద్రమాయ అయిన విచిత్ర ఆకారాన్ని ఎదుర్కొన్న సన్నివేశంలో రవికాంత్ ట్రిక్స్ అద్భుతం అనిపిస్తాయి. యువకునిగా ప్రేమ మోహం తెలియని అమాయకునిగా, సింహాసనం అధిష్టించాక భస్మాసురుని ఆహార్యం, వైఖరిలో మార్పు, భార్యని తప్ప అన్య స్త్రీలను ఆశించని సుగుణం, ఇంద్రాణి చాయా దేవి)ని తన భార్యకు సేవకురాలిగా తేవటం, కల్యాణి అది తగదని అంటూ ఆమెను గౌరవించటం, ఆకసంలో చంద్రుడిని తన కుమార్తె ఆడుకునే బాలుడిగా మార్చటం లాంటి సన్నివేశాలు దర్శకుడు బిఎ సుబ్బారావు దర్శకత్వ పటిమకు అద్దంపడతాయి.

చిన్నారులపై గీతం -అనగా అనగా ఒక పాప కోరే జాబిలిని (ఆరుద్ర -గానం బెంగుళూరు లత),

విష్ణుమూర్తి వద్దకు నారదుడు వచ్చే సమయంలో బ్యాక్గ్రౌండ్లో చెంచులక్ష్మి చిత్రంలోని ‘కరుణాలవాల’ గీతం వినిపించటంలాంటి వాటిని గమనిస్తే దర్శకులు సుబ్బారావు ఎంతో ఆసక్తికరంగా సన్నివేశాలను రూపొందించారన్న భావన కలుగుతుంది.

చిత్రంలో భస్మాసురునిగా ఎస్వి రంగారావు సన్నివేశానుగుణమైన అమాయకతను, శౌర్యాన్ని, భక్తివినమ్రతలను ప్రదర్శిస్తూ భావయుక్తమైన, గంభీరమైన నిండుతనంతో కూడిన నటన కనబర్చారు. మిగిలిన పాత్రధారులను డామినేట్ చేసేలా ఆ పాత్ర రూపొందటం, దాన్ని అంత పరిణితితో ఎస్వీఆర్ మెప్పించటం విశేషం. పద్మినితో సమానంగా నృత్యాభినయానికి, తన పర్సనాలిటీతో కొంత కష్టమే అయినా ప్రశంసనీయంగా శ్రమించటం వారికే తగింది. మిగిలిన పాత్రధారులందరూ పరిపక్వతతో రాణించే నటనతో మెప్పించారు.

మోహినిగా ప్రముఖ నృత్య తార పద్మిని నటించటం చేత ఆమెపై నాలుగు విధాలైన నృత్యాలను చిత్రీకరించారు.

పూల తోటలో -నేనే సుమా లేత చిరుగాలిని,

వూయలపై నిలబడి వూగుతూ -తీయనైన ఊహల తేలీ తేలీ ఊగెద,

ఆకసంలో మబ్బులపై తేలుతూ -ప్రశాంతమే నిశీధము,

కోనేరువద్ద -కోనీట నా నీడ , పద్మిని నృత్యం .

చివరిగా భస్మాసురునితో కలిసి పాడాలి. మది ఆడేలా పట్టు సాధన చేయాలి.

ఆ విషయంలో నృత్య తార పద్మిని తన అనుభవాన్ని రంగరించి అద్భుతాన్ని ప్రదర్శించారు. పద్మిని నృత్యం, ఆరుద్ర రచన, పి సుశీల గానంతో సాగే గీతాలు అద్భుత కళారాధనతో సాగుతాయి.

అసురునితో నృత్యం మోక్షసాధన మార్గంగా వివిధ భంగిమలలో సాగటాన్ని ఉత్తేజకరంగా చిత్రీకరించి ఆనందింప చేయటం విశేషం.
విజయమిదిగో లభించేను

ఆత్మశక్తి వలన మోహినిపై తన వరం పనిచేయలేదని, దానిని సాధించి కుమార్తెను బతికించుకోవాలనే తపనతో భస్మాసురుడు మోహిని మాయలో పడ్డాడని కథను నడపటం ప్రత్యేకతగా నిలిచింది. పౌరాణిక చిత్రాల స్థాయికి తగిన సంభాషణలు, ఇంద్రుడు, భస్మాసురునిపై చిత్రీకరించిన పద్యాలను అర్ధవంతంగా రచయిత వెంకట్రావు సమకూర్చారు.

‘త్రిజగాల పాలించు దేవేంద్రా’ (రఘురామయ్య, మాధవపెద్ది సంవాద పద్యాలు),

ఈశ్వరుడు తన బృందంతో కోయవేషంలో చేసే నృత్య గీతం -కొండకోనలో పూలతోటలో (ఆరుద్ర -ఘంటసాల, సుశీల బృందం),

అనురాధపై చిత్రీకరించిన గీతం -ఇది ఏమిటో నా మేను (ఆరుద్ర -పి సుశీల),

నాగేష్పై చిత్రీకరించిన గీతం -నారాయణ అనరాదా (కొసరాజు -మాధవపెద్ది) వినసొంపుగాను, చూడముచ్చటగానూ అనిపిస్తాయి.

ఎస్ రాజేశ్వరరావు స్వరాలలో ఆరుద్ర, కొసరాజు, గబ్బిట సాహిత్యంతో, పద్మిని నృత్యాలతో ‘మోహిని భస్మాసుర’ చిత్రం వైవిధ్య భరితంగా రూపొంది ప్రేక్షకులను ఆకట్టుకుంది.

టంగుటూరి ప్రకాశం పంతులు మునిమనవలు మాస్టర్ ప్రవీణ్, బేబీ అవంతి ఈ చిత్రంలో (అనగా అనగా పాటలో) నటించారు. బేబీ అవంతి భస్మాసురుని కుమార్తెగానూ కనిపిస్తుంది. మోహినీ భస్మాసుర చిత్రం జనరంజకంగా రూపొందినా ఆర్థికంగా విజయం సాధించలేదు. ఒకసారి రూపొందిన పౌరాణిక చిత్రాలు మైరావణ, మోహినీ భస్మాసుర, భీష్మ, చెంచులక్ష్మి వంటి చిత్రాలను తిరిగి నిర్మించటం, నిర్మాత బిఏ సుబ్బారావుకు పౌరాణికాల పట్లవున్న ఆసక్తి, అభిరుచిని తెలియజేస్తాయి. ఈ విషయంలో జయాపజయాలను లెక్కించని ఆయన వైఖరిని అభినందించాలి. ‘మోహినీ భస్మాసుర’ చిత్రాన్ని కన్నడంలో రాజ్కుమార్, లీలావతి, ఉదయకుమార్, టిఎన్ బాలకృష్ణలతో ఎన్ఎస్ వర్మ దర్శకత్వంలో టి మాడర్ నిర్మించారు. సంగీతం టి చలపతిరావు సమకూర్చారు.

Read this also

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.